Përse një Qendër për Autizmin?

I keni parë sa alarmante janë shifrat? 1 në 68 fëmijë diagnostifikohet me Çrregullimin e Spektrit të Autizmit dhe kjo shifër është çdo vit dhe më e lartë.

Spektri i Autizmit, është një çrregullim i cili nuk prek vetëm individin e diagnostikuar, por mbi të gjitha është një përgjegjësi që bie mbi prindin, familjen dhe komunitetin, dhe nuk është aspak e lehtë për të bashkëjetuar me të.

Shpeshherë, kur flitet për Autizmin, fokusi bie mbi personat që e mbartin këtë çrregullim, e ndërsa harrojmë të mendojmë se në fakt, peshën më të madhe emocionale, ekonomike dhe shoqërore e mbajnë prindërit dhe familja në tërësi.

Një qendër Tiss-i, ka pikërisht këtë fokus, ofrimin e një shërbimi i cili, duke bërë bashkë të gjithë komponentët, do të rezultojë më efektiv në trajtimin e thelluar dhe profesional, si edhe mbi të gjitha, zhvillimin e fëmijës së diagnostikuar. Pra, përveç terapisë që ndiqet për fëmijët, paralelisht realizohet edhe trajnimi i prindërve dhe kujdestarëve të këtyre fëmijëve. Kjo bëhet së pari, për të ndjekur një linjë trajtimi i cili do të maksimalizojë efektin e tij, por njëkohësisht edhe për të lehtësuar peshën e tyre dhe për t’i bërë ata më të përgatitur për t’u përballur me vështirësitë e një ndër çrregullimeve më komplekse të shekullit.

Tiss ka lindur nga nxitja e një grupi prindërish të fëmijëve me autizwm dhe jo vetëm, të cilët vazhdimisht raportonin nevojën e një qendre ku në fokus të saj të ishte e gjithë familja, si një strukturë e cila preket nga të paturit e një fëmije me çrregullime të sjelljes dhe zhvillimit. Ne besojmë se kjo është një iniciativë ndihmuese dhe lehtësuese, ku nevojitet bashkëpunimi i të gjithëve, në kapërcimin e këtij “tiss-i”, i cili mbart në vetvete sfida të mëdha.

Ne besojmë se bashkimi është forcë, e kështu, vetëm së bashku mund t’ja dalim për një jetesë më të lehtësuar në një shoqëri jo dhe aq të përgatitur për realitete të tilla.Vetëm së bashku mund të mësojmë dhe për rrjedhojë të jetojmë më paqësisht me sfidat që sjell autizmi.